Programa EMERXENDO- ITINERARIOS DE INCLUSIÓN BÁSICA, dende o 1 de maio de 2025.

Programa  subvencionado conforme a ORDE do 23 de maio de 2025 pola que se establecen as bases que rexerán a concesión de subvencións a entidades privadas de iniciativa social para a promoción de actuacións de servizos sociais comunitarios e inclusión social para os anos 2025 a 2027, cofinanciada parcialmente pola Unión Europea no marco do Programa FSE+ Galicia 2021-2027, e se procede á súa convocatoria (código de procedemento BS631A)

DESCRICIÓN DA ACTUACIÓN

Emerxendo – Itinerarios de Inclusión BÁSICA desenvolve accións de apoio ás persoas en situación de vulnerabilidade, centrado no acompañamento próximo e na activación das súas capacidades persoais, sociais e profesionais. A intervención parte dun proceso de diagnóstico individualizado que permite identificar o perfil profesional, recoñecer fortalezas e áreas de mellora, e definir un itinerario de inserción adaptado ás necesidades de cada participante.

Neste marco, trabállase a posta en valor da experiencia vital e laboral, a definición de obxectivos profesionais realistas e a mellora de ferramentas como o currículo, a carta de presentación ou a preparación para entrevistas de emprego. A actuación complétase cun seguimento social continuado e coa promoción de habilidades clave para a vida diaria e a empregabilidade, favorecendo a autonomía e o desenvolvemento persoal.

Así mesmo, ofrécense accións formativas e informativas orientadas á adquisición de competencias dixitais aplicadas á busca de emprego, ao coñecemento dos dereitos laborais e da realidade migratoria, e ao acompañamento na xestión de trámites de homologación de estudos estranxeiros, facilitando o acceso das persoas participantes a novas oportunidades formativas e profesionais.

OBXECTIVOS

• Favorecer a inclusión social e laboral das persoas participantes nos itinerarios
• Promover a adquisición de hábitos saudábeis de vida e recursos sociais e persoais para o desenvolvemento da vida diaria
• Reforzar a adquisición de recursos para o desenvolvemento sociocultural e laboral
• Ampliar e fortalecer as redes de participación nas accións de inclusión

PERSOAS DESTINATARIAS

De acordo co artigo 3, sobre criterios para a valoración da situación de exclusión social ou de risco de exclusión social, da Lei 10/2013, do 27 de novembro, de Inclusión Social de Galicia, considéranse destinatarias aquelas persoas desempregadas ou con empregos precarios que se atopan en situación de vulnerabilidade ou risco de exclusión social, derivada da falta de recursos económicos e sociais.